బెంగళూరు 25 మే (హి.స.)

కర్ణాటక కాంగ్రెస్లో కొంతకాలంగా కొనసాగుతున్న ఊహాగానాలకు బలం చేకూరుస్తూ కీలక పరిణామం చోటుచేసుకుంది. ముఖ్యమంత్రి సిద్ధరామయ్యను పార్టీ హైకమాండ్ ఢిల్లీకి పిలిచింది. మే 26న ఢిల్లీకి రావాలని ఆయనకు ఆదేశాలు అందినట్లు పార్టీ వర్గాల ద్వారా తెలిసింది. త్వరలో జరగనున్న రాజ్యసభ ఎన్నికలపై చర్చించేందుకే ఈ సమావేశమని అధికారికంగా చెబుతున్నప్పటికీ, దీని వెనుక ఇతర రాజకీయ కారణాలు ఉన్నాయనే ప్రచారం జోరుగా సాగుతోంది.

కేబినెట్ పునర్వ్యవస్థీకరణ, అధికార పంపకాల ఒప్పందాలు, విధాన మండలి ఎన్నికలకు అభ్యర్థుల ఎంపిక వంటి కీలక అంశాలపై ఈ పర్యటనలో చర్చ జరిగే అవకాశం ఉందని రాజకీయ వర్గాలు విశ్లేషిస్తున్నాయి. ఈ పరిణామం కర్ణాటక కాంగ్రెస్లో కొత్త రాజకీయ చర్చకు దారితీసింది.

ఈ విషయంపై డిప్యూటీ సీఎం, కేపీసీసీ అధ్యక్షుడు డీకే శివకుమార్ ఆసక్తికర వ్యాఖ్యలు చేశారు. సీఎం సిద్ధరామయ్యను ఢిల్లీకి పిలిచిన విషయం తనకు తెలియదని ఆదివారం మీడియా వద్ద అన్నారు. ఈ విషయం గురించి నాకేమీ సమాచారం లేదు. అది రాజ్యసభ ఎన్నికల గురించా? లేక నాయకత్వ మార్పు గురించా? అనేది కూడా నాకు తెలియదు అని ఆయన స్పష్టం చేశారు.

మరోవైపు, హోంమంత్రి జి.పరమేశ్వర నాయకత్వ మార్పు ఊహాగానాలను కొట్టిపారేశారు. ముఖ్యమంత్రి పదవిపై ఎలాంటి నిర్ణయమైనా హైకమాండే తీసుకుంటుందని, అసలు నాయకత్వ మార్పు గురించి ఎవరు ప్రశ్న లేవనెత్తారని ఆయన అన్నారు. కాగా, బీజేపీ నేత రాధా మోహన్ దాస్ అగర్వాల్ మాత్రం, కాంగ్రెస్ అధ్యక్షుడు మల్లికార్జున ఖర్గే తన రాజకీయ ప్రయోజనాల కోసం సిద్ధరామయ్య, శివకుమార్ల మధ్య విభేదాలు సృష్టిస్తున్నారని ఆరోపించారు.

---------------

హిందూస్తాన్ సమచార్ / Santhosha Laxmi