న్యూఢిల్లీ, 23 జూన్ (హి.స.)మాజీ కేంద్ర మంత్రి మేనకా గాంధీ మరియు ఆమె కుమారుడు వరుణ్ గాంధీలు మంగళవారం ఉదయం న్యూఢిల్లీలోని 'శాంతి వన్' స్మారక స్థలానికి చేరుకుని స్వర్గీయ సంజయ్ గాంధీ 46వ వర్ధంతి సందర్భంగా ఆయనకు ఘన నివాళులర్పించారు. 1980లో జరిగిన విమాన ప్రమాదంలో ప్రాణాలు కోల్పోయిన సంజయ్ గాంధీ జ్ఞాపకార్థం కుటుంబ సభ్యులు అక్కడ ప్రత్యేక ప్రార్థనలు నిర్వహించారు. అదేవిధంగా, కాంగ్రెస్ పార్టీ కూడా మాజీ ఎంపీ సంజయ్ గాంధీ వర్ధంతిని పురస్కరించుకుని, దేశ యువతను ఏకం చేయడంలో మరియు పార్టీ బలోపేతానికి ఆయన చేసిన కృషిని గుర్తుచేసుకుంది. దేశ నిర్మాణంలో యువత భాగస్వామ్యం కోసం ఆయన పడ్డ తపన ఎప్పటికీ గుర్తుండిపోతుందని కాంగ్రెస్ పార్టీ సోషల్ మీడియా వేదిక 'X' ద్వారా అధికారిక సందేశాన్ని పంచుకుంది.మాజీ పార్లమెంట్ సభ్యుడైన సంజయ్ గాంధీ, 1980 జనవరిలో జరిగిన సార్వత్రిక ఎన్నికల్లో అమేథీ నియోజకవర్గం నుండి కాంగ్రెస్ అభ్యర్థిగా విజయం సాధించారు. ఆ తర్వాత మే 1980లో ఆయన కాంగ్రెస్ పార్టీ ప్రధాన కార్యదర్శిగా నియమితులయ్యారు. అయితే, పదవిని చేపట్టిన కేవలం ఒక నెల రోజుల్లోనే, అనగా 1920 జూన్ 23న న్యూఢిల్లీలోని సఫ్దర్జంగ్ విమానాశ్రయం సమీపంలో ఢిల్లీ ఫ్లయింగ్ క్లబ్కు చెందిన ఒక కొత్త విమానంలో ఆయన విన్యాసాలు (Aerobatic Manoeuvre) చేస్తుండగా నియంత్రణ కోల్పోయి విమానం కుప్పకూలింది. ఈ ఘోర ప్రమాదంలో తలకు తీవ్ర గాయాలవ్వడం వల్ల సంజయ్ గాంధీ అక్కడికక్కడే మరణించగా, ఆయనతో పాటు విమానంలో ప్రయాణించిన కెప్టెన్ సుభాష్ సక్సేనా కూడా ప్రాణాలు కోల్పోయారు.

హిందూస్తాన్ సమచార్ / Santhosha Laxmi