హైదరాబాద్, 28 జూన్ (హి.స.)
మహాత్మా గాంధీ జాతీయ గ్రామీణ ఉపాధి హామీ పథకం (MGNREGA) స్థానంలో కేంద్ర ప్రభుత్వం ప్రతిష్టాత్మకంగా తీసుకొచ్చిన 'వికసిత్ భారత్-గ్యారెంటీ ఫర్ రోజ్గార్ అండ్ ఆజీవిక మిషన్ (గ్రామీణ్)' అంటే 'విబి జి రామ్ జి' (VB-G RAM G) చట్టంపై కాంగ్రెస్ పార్టీ తీవ్రస్థాయిలో ధ్వజమెత్తింది. ఈ కొత్త విధానం వల్ల దేశంలో కేంద్రీకృత పాలన పెరిగిపోతుందని, అలాగే రాష్ట్ర ప్రభుత్వాలపై ఊహించని రీతిలో భారీ ఆర్థిక భారం పడుతుందని కాంగ్రెస్ ఆరోపించింది.
గతంలో ఉన్న ఉపాధి హామీ పథకం పూర్తిగా గ్రామీణ కూలీల డిమాండ్ ఆధారంగా నడిచేదని, పని అడిగిన ప్రతి ఒక్కరికీ ఉపాధి కల్పించాల్సిన బాధ్యత కేంద్ర, రాష్ట్ర ప్రభుత్వాలపై ఉండేదని కాంగ్రెస్ గుర్తుచేసింది. ముఖ్యంగా నైపుణ్యం లేని కూలీల వేతనాల మొత్తాన్ని కేంద్ర ప్రభుత్వమే భరించేదని పేర్కొంది. అయితే, కొత్తగా వచ్చిన 'విబి జి రామ్ జి' చట్టం ద్వారా ఈ హక్కుల ఆధారిత విధానాన్ని మార్చేసి, బడ్జెట్ కేటాయింపులు మరియు నిబంధనలను కేంద్రమే ముందే నిర్ణయిస్తోందని విమర్శించింది. దీనివల్ల స్థానిక గ్రామసభల అధికారం పోయి, ఢిల్లీ నుంచే పూర్తి నియంత్రణ సాగుతుందని ఆందోళన వ్యక్తం చేసింది.
ఈ చట్టంలో తీసుకొచ్చిన సరికొత్త నిధుల పంపిణీ నిష్పత్తి (60:40) రాష్ట్రాలకు పెద్ద శాపంగా మారబోతోందని కాంగ్రెస్ విశ్లేషించింది. కేంద్రం తెచ్చిన కొత్త నిబంధనల ప్రకారం మొత్తం ఖర్చులో 60 శాతం కేంద్రం భరిస్తే, మిగిలిన 40 శాతం నిధులను రాష్ట్ర ప్రభుత్వాలే సమకూర్చుకోవాల్సి ఉంటుంది. ఉపాధి హామీ వేతనాల్లో కూడా రాష్ట్రాలు 40 శాతం వాటా కట్టాల్సి రావడం వల్ల, రాష్ట్రాల ఖజానాలపై వేల కోట్ల రూపాయల అదనపు భారం పడుతుందని, ఇది వారి సొంత సంక్షేమ పథకాలపై తీవ్ర ప్రభావం చూపుతుందని కాంగ్రెస్ మండిపడింది. స్థానిక అవసరాలకు కాకుండా కేంద్రం నిర్దేశించిన జాతీయ మౌలిక సదుపాయాల ప్రాధాన్యతల ప్రకారమే పనులు చేయాలనడం పంచాయతీల స్వయంప్రతిపత్తిని దెబ్బతీయడమేనని స్పష్టం చేసింది.
---------------
హిందూస్తాన్ సమచార్ / Santhosha Laxmi
