భువనగిరి24 ఆగస్టు (హి.స.)

: యాదాద్రి జిల్లా చౌటుప్పల్ మండలం జై కేసారం గ్రామంలో ఉన్న SR ల్యాబ్ కెమికల్ పరిశ్రమలో భారీ అగ్నిప్రమాదం చోటు చేసుకుంది. అకస్మాత్తుగా మంటలు చెలరేగడంతో కొద్ది సేపట్లోనే పెద్ద ఎత్తున దగ్ధమయ్యాయి. పరిశ్రమ అంతటా మంటలు వ్యాపించడంతో ఉద్యోగులు భయాందోళనలకు గురై బయటకు పరుగులు తీశారు. మంటలు ఎగసిపడుతున్న సమాచారంతో ఫైర్ సిబ్బంది తక్షణమే ఘటనాస్థలికి చేరుకుని ఫైర్ ఇంజన్ల సాయంతో అగ్నిమాపన చర్యలు చేపట్టారు. మంటలను అదుపులోకి తెచ్చే ప్రయత్నాలు కొనసాగుతున్నాయి.

ఇక పరిశ్రమలోని రసాయనాలు కారణంగా మంటలు మరింత తీవ్రరూపం దాల్చినట్టు అధికారులు అనుమానిస్తున్నారు. అదృష్టవశాత్తూ ఇప్పటివరకు ఎటువంటి ప్రాణనష్టం జరగలేదని ప్రాథమిక సమాచారం. అయితే ఆస్తి నష్టం పెద్దఎత్తున జరిగే అవకాశముందని అంచనా. ప్రమాదానికి గల కారణం స్పష్టంగా తెలియరాలేదు.

---------------

హిందూస్తాన్ సమచార్ / నిత్తల రాజీవ