తిరుపతి: , 26 ఆగస్టు (హి.స.)తిరుమల తిరుపతి దేవస్థానం (TTD) పవిత్రతను కాపాడేందుకు చిత్తశుద్ధితో పనిచేస్తున్నామని తితిదే ఛైర్మన్‌ బీఆర్‌ నాయుడు (BR Naidu) తెలిపారు. ముంతాజ్‌ హోటల్‌ వ్యవహారంపై పద్మావతి అతిథిగృహంలో ఏర్పాటు చేసిన మీడియా సమావేశంలో ఆయన మాట్లాడారు. కోట్లాది రూపాయల తితిదే నిధులు వైకాపా నేతలు మింగేశారని ధ్వజమెత్తారు.

‘‘ఏడు కొండలను ఆనుకొని ఉన్న ప్రాంతాన్ని ముంతాజ్‌ హోటల్‌కు కేటాయించడం వైకాపా చేసిన తప్పు. పవిత్ర తిరుమలలో ముంతాజ్‌ హోటల్‌ నిర్మాణం సరికాదని చంద్రబాబు చెప్పారు. యాజమాన్యాన్ని ఒప్పించి మరోచోట 25 ఎకరాలు తీసుకునేందుకు చంద్రబాబు ఒప్పించారు. తితిదే భూములను ప్రైవేటు సంస్థలకు ఇస్తున్నారని దుష్ప్రచారం చేస్తున్నారు. ఈ అంశంలో సీబీఐ విచారణ జరిపించాలని వైకాపా నేతలు అడగటం హాస్యాస్పదం. వైకాపా నేతలు డబ్బు వెదజల్లి అందరినీ కొనేందుకు అలవాటుపడ్డారు. మేం బోర్డులోకి వచ్చాక అవినీతికి ఆస్కారం లేకుండా పనిచేస్తున్నాం. ముంతాజ్‌ హోటల్‌కు భూములు ఇచ్చేందుకు అజయ్‌ అనే వ్యక్తిని బెదిరించారు.

---------------

హిందూస్తాన్ సమచార్ / నాగరాజ్ రావు