అమరావతి , 10 నవంబర్ (హి.స.)

ఆంధ్రప్రదేశ్లో పెట్టుబడులను ఆకర్షించి పారిశ్రామిక అభివృద్ధికి ఊతమిచ్చే లక్ష్యంతో రాష్ట్ర ప్రభుత్వం కీలక కార్యక్రమానికి సిద్ధమవుతోంది. ఈ నెల 12, 13 తేదీల్లో విశాఖపట్నంలో నిర్వహించనున్న సీఐఐ భాగస్వామ్య సదస్సును ప్రతిష్ఠాత్మకంగా తీసుకుంది. ఈ సదస్సు ద్వారా రాష్ట్రానికి భారీగా పెట్టుబడులు తీసుకురావడంతో పాటు కొత్త పరిశ్రమల ఏర్పాటుకు మార్గం సుగమం చేయాలని ప్రభుత్వం భావిస్తోంది.

సదస్సు నిర్వహణ కోసం ఇప్పటికే అధికారులు విస్తృత ఏర్పాట్లు చేపట్టారు. దేశీయ, అంతర్జాతీయ పారిశ్రామికవేత్తలు, పెట్టుబడిదారులు, వివిధ సంస్థల ప్రతినిధులు ఈ కార్యక్రమానికి హాజరయ్యే అవకాశం ఉండటంతో అవసరమైన సదుపాయాల కల్పనపై ప్రత్యేక దృష్టి పెట్టారు. అతిథుల రాకపోకలు, వసతి, రవాణా, భద్రత, సమావేశ ప్రాంగణాల నిర్వహణ వంటి అంశాలపై ఏర్పాట్లు చేస్తున్నారు.

రాష్ట్రంలో పరిశ్రమలకు అనుకూలమైన వాతావరణం, అందుబాటులో ఉన్న వనరులు, మౌలిక సదుపాయాలు, ప్రభుత్వం అందిస్తున్న ప్రోత్సాహకాలను పెట్టుబడిదారులకు వివరించేందుకు ప్రణాళికలు రూపొందిస్తున్నారు. ముఖ్యంగా యువతకు ఉపాధి అవకాశాలు కల్పించడం, పారిశ్రామిక రంగాన్ని విస్తరించడం ఈ సదస్సు ప్రధాన లక్ష్యాలుగా ఉన్నాయి. ఈ కార్యక్రమం ద్వారా ఏపీని పెట్టుబడులకు ప్రధాన గమ్యస్థానంగా నిలబెట్టాలని ప్రభుత్వం కృషి చేస్తోంది.

---------------

హిందూస్తాన్ సమచార్ / పుట్టా సుమన్