హైదరాబాద్ , 12 నవంబర్ (హి.స.)తెలంగాణలో 22ఏ భూములకు సంబంధించిన దరఖాస్తుల పరిష్కారంపై రాష్ట్ర ప్రభుత్వం ప్రత్యేక దృష్టి సారించింది. ఈ దరఖాస్తులను యుద్ధప్రాతిపదికన పరిష్కరించాలని మంత్రి పొంగులేటి శ్రీనివాస్ రెడ్డి జిల్లా కలెక్టర్లు, రిజిస్ట్రార్లను ఆదేశించారు. ఈ విషయంలో అధికారులు నిర్లక్ష్యం వహించకూడదని స్పష్టం చేశారు.

22ఏ జాబితాలో ఉన్న భూములకు సంబంధించి ప్రజలు ఎదుర్కొంటున్న సమస్యలను త్వరితగతిన పరిష్కరించాల్సిన బాధ్యత అధికారులపై ఉందని మంత్రి పేర్కొన్నారు. దరఖాస్తుల పరిశీలనలో అనవసర జాప్యం జరగకుండా చర్యలు తీసుకోవాలని సూచించారు. ఒక్క దరఖాస్తు కూడా పెండింగ్లో ఉండటానికి వీల్లేదని స్పష్టం చేశారు.

ఈ ప్రక్రియను జిల్లా కలెక్టర్లు ప్రత్యేకంగా పర్యవేక్షించాలని, అవసరమైన సందర్భాల్లో సంబంధిత అధికారులతో సమీక్షలు నిర్వహించాలని ఆదేశించారు. ప్రజలు తమ భూములకు సంబంధించిన సమస్యల పరిష్కారం కోసం కార్యాలయాల చుట్టూ తిరిగే పరిస్థితి ఉండకూడదని తెలిపారు. దరఖాస్తుల పరిష్కారంలో పారదర్శకత పాటిస్తూ నిర్ణీత సమయంలో ప్రక్రియను పూర్తి చేయాలని సూచించారు.

మంత్రి ఆదేశాల నేపథ్యంలో జిల్లా యంత్రాంగం 22ఏ దరఖాస్తుల పరిష్కారంపై ప్రత్యేక కార్యాచరణ చేపట్టాల్సి ఉంది.

---------------

హిందూస్తాన్ సమచార్ / పుట్టా సుమన్