బెంగళూరు,, 13 నవంబర్ (హి.స.)

దేశ ఐటీ రాజధాని బెంగళూరు మౌలిక వసతుల కల్పనలో మరో చారిత్రక ఘట్టం ఆవిష్కృతమైంది. కర్ణాటక పర్యటనలో ఉన్న ప్రధానమంత్రి నరేంద్ర మోదీ శుక్రవారం నగరంలో రూ. 15,600 కోట్లకు పైగా విలువైన బహుళ అభివృద్ధి ప్రాజెక్టులను జాతికి అంకితం చేశారు. నగరంలో ట్రాఫిక్ రద్దీని తగ్గించి, ప్రజా రవాణాను మరింత సులభతరం చేసే లక్ష్యంతో నిర్మించిన బెంగళూరు మెట్రో 'పింక్ లైన్' (గులాబీ మార్గం) ఎలివేటెడ్ విభాగాన్ని ప్రధాని జెండా ఊపి ప్రారంభించారు. కాలేన అగ్రహార నుంచి తావరెకెరె వరకు నిర్మించిన ఈ మార్గం దక్షిణ బెంగళూరు వాసులకు పెద్ద ఊరటనివ్వనుంది. ప్రారంభోత్సవం అనంతరం ప్రధాని మోదీ స్వయంగా తావరెకెరె స్టేషన్ నుంచి ఐఐఎం బెంగళూరు స్టేషన్ వరకు మెట్రో రైలులో ప్రయాణించారు. ప్రయాణ సమయంలో ఆయన విద్యార్థులు, సామాన్య ప్రయాణికులతో ఆత్మీయంగా ముచ్చటించి వారి అభిప్రాయాలను తెలుసుకున్నారు.

దీనితో పాటు రైల్వే రంగానికి పెద్దపీట వేస్తూ బెంగళూరు–మంగళూరు–మడ్గావ్ మధ్య నూతన వందే భారత్ ఎక్స్‌ప్రెస్ రైలుకు ప్రధాని పచ్చజెండా ఊపారు. పశ్చిమ కనుమల గుండా సాగే ఈ ఆధునిక రైలు ప్రయాణం వల్ల కర్ణాటక, గోవా రాష్ట్రాల మధ్య పర్యాటక, వాణిజ్య సంబంధాలు మరింత బలోపేతం కానున్నాయి. అలాగే సక్లేశ్‌పూర్–సుబ్రహ్మణ్య రోడ్ ఘాట్ రైల్వే సెక్షన్ విద్యుదీకరణ పనులను, అమృత్ భారత్ స్టేషన్ పథకం కింద ఆధునీకరించిన నాలుగు రైల్వే స్టేషన్లను ఆయన ప్రారంభించారు. ఇంధన భద్రతను పెంచే దిశగా మంగళూరులో నిర్మించిన దేశంలోనే అతిపెద్ద భూగర్భ ఎల్‌పీజీ నిల్వ కేంద్రాన్ని, మైసూరులో దేశంలోనే తొలి ఎల్‌ఈడీ డోమ్ తారామండలాన్ని ప్రధాని జాతికి అంకితం చేశారు. ఈ సందర్భంగా ఏర్పాటు చేసిన సభలో ప్రధాని మాట్లాడుతూ.. ఆధునిక మౌలిక వసతులే వికసిత్ భారత్ నిర్మాణానికి బలమైన పునాదులని పేర్కొన్నారు. కర్ణాటక అభివృద్ధికి కేంద్ర ప్రభుత్వం కట్టుబడి ఉందని ఆయన స్పష్టం చేశారు.

---------------

హిందూస్తాన్ సమచార్ / Santhosha Laxmi