న్యూఢిల్లీ, 13 నవంబర్ (హి.స.)

భారత్ మరియు ఇటలీ దేశాల మధ్య ఉన్న వ్యూహాత్మక భాగస్వామ్యాన్ని శాస్త్ర, సాంకేతిక రంగాలలో మరింత ఉన్నత స్థాయికి తీసుకెళ్లాలని ఇరు దేశాలు నిర్ణయించాయి. కేంద్ర శాస్త్ర, సాంకేతిక శాఖ మంత్రి డాక్టర్ జితేంద్ర సింగ్, భారత్ పర్యటనకు వచ్చిన ఇటలీ యూనివర్సిటీ మరియు పరిశోధనల శాఖ మంత్రి అన్నా మరియా బెర్నినితో శుక్రవారం న్యూఢిల్లీలో ఉన్నత స్థాయి ద్వైపాక్షిక సమావేశం నిర్వహించారు. ఈ భేటీలో ఇరు దేశాల మధ్య కొనసాగుతున్న పరిశోధన కార్యక్రమాల పురోగతిని సమీక్షించడంతో పాటు, భవిష్యత్ కార్యాచరణపై కీలక ఒప్పందాలకు రూపకల్పన చేశారు.

ముఖ్యంగా రాబోయే 2027 సంవత్సరంలో ఇరు దేశాల శాస్త్రవేత్తలు, విశ్వవిద్యాలయాల సంయుక్త ఆధ్వర్యంలో కొత్త పరిశోధన ప్రాజెక్టులను ప్రారంభించాలని మంత్రులు నిర్ణయించారు. కృత్రిమ మేధస్సు (AI), క్లీన్ ఎనర్జీ, బయోటెక్నాలజీ, అంతరిక్ష పరిశోధనలు మరియు వాతావరణ మార్పుల నియంత్రణ వంటి ఆధునిక రంగాలలో సాంకేతిక పరిజ్ఞానాన్ని పరస్పరం పంచుకోవాలని అంగీకరించారు. భారతీయ యువ పరిశోధకులు, విద్యార్థులకు ఇటలీలోని ప్రతిష్టాత్మక విశ్వవిద్యాలయాల్లో పరిశోధన అవకాశాలు కల్పించడం, అలాగే ఇటలీ నిపుణులకు భారతదేశంలోని అత్యాధునిక ల్యాబ్‌లలో పనిచేసే వీలు కల్పించడంపై చర్చ జరిగింది. ప్రపంచ సవాళ్లను ఎదుర్కోవడానికి ఇరు దేశాల మేధో సంపత్తిని ఏకం చేయడం ఎంతో అవసరమని డాక్టర్ జితేంద్ర సింగ్ ఈ సందర్భంగా పేర్కొన్నారు. ఈ సహకారం ఇరు దేశాల ఆర్థిక, సాంకేతిక అభివృద్ధికి కొత్త బాటలు వేయనుంది.

---------------

హిందూస్తాన్ సమచార్ / Santhosha Laxmi