
అమరావతి , 18 నవంబర్ (హి.స.)
అనంతపురం జిల్లాలో తీవ్ర కలకలం రేపిన రాప్తాడు ఘటనలో నిందితుడు హేమంత్ను పోలీసులు జిల్లా జైలుకు తరలించారు. కర్నూలు ఆస్పత్రిలో చికిత్స పొందుతున్న అతడిని వైద్య చికిత్స పూర్తయిన అనంతరం పోలీసుల భద్రత మధ్య అనంతపురం జిల్లా జైలుకు తీసుకెళ్లారు. ఈ సందర్భంగా ఎలాంటి అవాంఛనీయ ఘటనలు చోటుచేసుకోకుండా పోలీసులు జాగ్రత్తలు తీసుకున్నారు.
రాప్తాడులోని ఓ పాఠశాలలోకి ప్రవేశించిన హేమంత్.. పదో తరగతి చదువుతున్న బాలికపై రంపంతో దాడి చేసిన ఘటన తీవ్ర సంచలనం సృష్టించింది. పాఠశాల ప్రాంగణంలోనే బాలికపై దాడికి పాల్పడటంతో విద్యార్థులు, ఉపాధ్యాయులు భయాందోళనకు గురయ్యారు. దాడి అనంతరం అక్కడి నుంచి తప్పించుకునేందుకు హేమంత్ ప్రయత్నించాడు. అతడిని పట్టుకునేందుకు పోలీసులు వెంబడించగా, పారిపోయే క్రమంలో పోలీసులు కాల్పులు జరిపారు. ఈ కాల్పుల్లో హేమంత్ కాళ్లకు గాయాలయ్యాయి.
దీంతో పోలీసులు అతడిని చికిత్స నిమిత్తం ఆస్పత్రికి తరలించారు. కర్నూలు ఆస్పత్రిలో వైద్యులు చికిత్స అందించిన తర్వాత కోలుకోవడంతో జైలుకు తరలించారు. ఈ ఘటనకు సంబంధించి తదుపరి దర్యాప్తును పోలీసులు కొనసాగిస్తున్నారు. బాలికపై దాడి ఘటన స్థానికంగా తీవ్ర చర్చనీయాంశంగా మారింది.
---------------
హిందూస్తాన్ సమచార్ / పుట్టా సుమన్