
జగిత్యాల , 20 నవంబర్ (హి.స.)
జగిత్యాల జిల్లాలోని ప్రముఖ పుణ్యక్షేత్రం కొండగట్టు అంజన్న ఆలయంలో భక్తులకు నేటి నుంచి స్వామివారి నిజరూప దర్శనం లభించనుంది. ఇన్నాళ్లూ చందనంతో అలంకరించిన రూపంలో దర్శనమిచ్చిన ఆంజనేయస్వామి ఇకపై అసలైన రూపంలో భక్తులకు దర్శనమివ్వనున్నారు. దీంతో స్వామివారి దర్శనం కోసం భక్తులు పెద్ద సంఖ్యలో తరలివచ్చే అవకాశం ఉంది.
కొండగట్టు ఆలయంలో నిర్వహించిన చందనోత్సవం నేటితో ముగియనుంది. ఈ సందర్భంగా ఆలయ అర్చకులు గర్భగుడిలో ప్రత్యేక పూజలు, సంప్రదాయబద్ధమైన క్రతువులు నిర్వహించారు. పూజా కార్యక్రమాలు పూర్తయిన అనంతరం స్వామివారికి చందన అలంకరణను తొలగించి నిజరూప దర్శనానికి ఏర్పాట్లు చేశారు.
నేటి నుంచి భక్తులు అంజన్న స్వామిని నిజరూపంలో దర్శించుకుని మొక్కులు చెల్లించుకోవచ్చు. ఈ నేపథ్యంలో ఆలయానికి వచ్చే భక్తుల సంఖ్య పెరిగే అవకాశం ఉందని అధికారులు అంచనా వేస్తున్నారు. భక్తులకు ఎలాంటి ఇబ్బందులు కలగకుండా అవసరమైన ఏర్పాట్లు చేస్తున్నారు.
చందనోత్సవం ముగిసి నిజరూప దర్శనాలు ప్రారంభం కావడంతో కొండగట్టు క్షేత్రంలో ఆధ్యాత్మిక సందడి నెలకొంది. స్వామివారి దర్శనం కోసం భక్తులు ఆసక్తిగా ఎదురుచూస్తున్నారు.
---------------
హిందూస్తాన్ సమచార్ / పుట్టా సుమన్