
అమరావతి , 20 నవంబర్ (హి.స.)
రాష్ట్రంలో జిల్లా పరిషత్లకు కొత్త నాయకత్వాన్ని ఎన్నుకునే ప్రక్రియ ప్రారంభమైంది. మొత్తం 28 జిల్లా పరిషత్లకు ఛైర్మన్, వైస్ ఛైర్మన్ల ఎన్నిక నిర్వహిస్తున్నారు. గతంలో రాష్ట్రంలో 13 జిల్లా పరిషత్లు మాత్రమే ఉండగా, జిల్లాల పునర్విభజనలో భాగంగా వాటి సంఖ్యను 28కి పెంచారు. ఈ మార్పు తర్వాత జరుగుతున్న తొలి ఎన్నిక కావడంతో రాజకీయంగా ప్రాధాన్యత సంతరించుకుంది.
కొత్తగా ఏర్పాటైన 15 జిల్లాల్లో జిల్లా పరిషత్లకు తొలిసారిగా ఛైర్మన్లను ఎన్నుకోనున్నారు. దీంతో ఆయా జిల్లాల్లో జడ్పీ పాలనకు కొత్త నాయకత్వం అందుబాటులోకి రానుంది. ఈ ఎన్నికల్లో విశాఖపట్నం జిల్లా పరిషత్ రాష్ట్రంలోనే అతి చిన్నదిగా నిలవగా, అత్యధిక మంది జడ్పీటీసీ సభ్యులు ఉన్న జిల్లా పరిషత్గా కడప గుర్తింపు పొందింది.
ఎన్నికల ప్రక్రియలో భాగంగా ఉదయం 11 గంటలకు ఛైర్మన్, వైస్ ఛైర్మన్ పదవులకు నామినేషన్ల స్వీకరణ చేపడతారు. అనంతరం మధ్యాహ్నం 12 గంటలకు ఎన్నిక నిర్వహిస్తారు. సభ్యుల మద్దతు ఆధారంగా కొత్త ఛైర్మన్, వైస్ ఛైర్మన్లను ఎన్నుకోనున్నారు. ఈ ఎన్నికలతో జిల్లా పరిషత్లకు పూర్తిస్థాయి పాలకవర్గాలు ఏర్పడనున్నాయి. ఆయా జిల్లాల అభివృద్ధి కార్యక్రమాలు, స్థానిక సమస్యల పరిష్కారంలో కొత్త పాలకవర్గాలు కీలక పాత్ర పోషించనున్నాయి.
---------------
హిందూస్తాన్ సమచార్ / పుట్టా సుమన్