అరుదైన జన్యు వ్యాధికి ఉచిత మందులు: ఏడుగురు చిన్నారులకు హైదరాబాద్ వైద్యురాలి బాసట
అరుదైన జన్యు వ్యాధికి ఉచిత మందులు: ఏడుగురు చిన్నారులకు హైదరాబాద్ వైద్యురాలి బాసట
medicine


హైదరాబాద్, 21 నవంబర్ (హి.స.)

తీవ్రమైన కండరాల బలహీనతకు కారణమయ్యే అత్యంత అరుదైన జన్యు వ్యాధి ‘అలన్-హెర్న్డన్-డడ్లీ సిండ్రోమ్’ (AHDS) బారిన పడిన దేశంలోని వివిధ ప్రాంతాలకు చెందిన ఏడుగురు చిన్నారులకు ఉచిత మందులు అందనున్నాయి. హైదరాబాద్‌కు చెందిన ప్రముఖ శిశువైద్య నిపుణురాలు డాక్టర్ శివరంజని సంతోష్ చేపట్టిన చొరవతో ఈ చిన్నారులకు ప్రాణదాన మందులు సమకూరాయి.

నెదర్లాండ్స్‌కు చెందిన ఫార్మాస్యూటికల్ అకౌంటబిలిటీ ఫౌండేషన్ (PAF), సివిల్ సొసైటీ కూటమి ‘యాక్సెస్ టు మెడిసిన్స్ ఇండియా’ ప్రతినిధి కె.ఎం. గోపకుమార్ సహకారంతో డాక్టర్ శివరంజని ఈ మందులను సమకూర్చారు. ఏహెచ్‌డీఎస్ (AHDS) చికిత్సకు అవసరమైన మందులు బ్రాండెడ్ రూపంలో అయితే ఒక్కో బిడ్డకు ఏడాదికి రూ. 4.68 కోట్ల నుంచి రూ. 9 కోట్ల వరకు ఖర్చవుతాయి. మాత్రలు, క్యాప్సూల్స్ రూపంలో ఉండే ఈ మందులను బాధిత చిన్నారులు జీవితాంతం వాడాల్సి ఉంటుంది. విపరీతమైన ఖర్చు కారణంగా సామాన్య కుటుంబాలు ఈ చికిత్సను భరించలేని పరిస్థితి నెలకొంది; మందులు అందుబాటులో లేక, ఖర్చు భరించలేక పలువురు చిన్నారులు ప్రాణాలు కోల్పోయిన సందర్భాలు ఉన్నాయి.

దాతల సహకారంతో నెదర్లాండ్స్‌లోని ట్రాన్స్‌వాల్ ఫార్మసీ ఈ మందును జనరిక్ రూపంలో చాలా తక్కువ ఖర్చుతో అభివృద్ధి చేసింది. దీనివల్ల కోట్ల రూపాయలుగా ఉన్న వార్షిక చికిత్స వ్యయం ఒక్కో బిడ్డకు రూ. 2.5 లక్షలకు తగ్గింది. ఏడుగురు చిన్నారులకు మందులు సమకూర్చేందుకు మొత్తం రూ. 15.09 లక్షలు అవసరమయ్యాయి. ఇందులో భారతదేశంలోని దాతల నుంచి డాక్టర్ శివరంజని రూ. 6.09 లక్షలు సమీకరించగా, నెదర్లాండ్స్‌కు చెందిన ఫౌండేషన్ మిగిలిన రూ. 9 లక్షలను అందజేసింది. నవంబర్ 30న బాధిత చిన్నారుల తల్లిదండ్రులకు ఈ మందులను అధికారికంగా అందజేయనున్నారు.

విదేశాల నుంచి మందులను దిగుమతి చేసుకోవడం శాశ్వత పరిష్కారం కాదని డాక్టర్ శివరంజని పేర్కొన్నారు. ఈ మందులను భారత్‌లోనే తయారు చేసే అవకాశాలను పరిశీలించాలని కోరుతూ కేంద్ర ప్రభుత్వాన్ని సంప్రదించనున్నట్లు తెలిపారు. అలాగే, దేశవ్యాప్తంగా ఈ అరుదైన జన్యు వ్యాధితో బాధపడుతున్న మరిన్ని చిన్నారులను గుర్తించేందుకు వైద్య నిపుణులతో కలిసి ప్రత్యేక సర్వే నిర్వహిస్తున్నట్లు ఆమె వెల్లడించారు.

---------------

హిందూస్తాన్ సమచార్ / Santhosha Laxmi


 rajesh pande