అమరావతి , 09 నవంబర్ (హి.స.)

ఆంధ్రప్రదేశ్లో ఇటీవల జరిగిన స్థానిక సంస్థల ఎన్నికలు అత్యంత పారదర్శకంగా, ప్రశాంతంగా ముగిశాయని ముఖ్యమంత్రి చంద్రబాబు నాయుడు స్పష్టం చేశారు. ఎన్నికల ఫలితాలు కూటమిపై ప్రజలకు ఉన్న నమ్మకాన్ని మరోసారి నిరూపించాయని పేర్కొన్నారు. విజయవాడలో నిర్వహించిన మీడియా సమావేశంలో ఆయన ఎన్నికల ఫలితాలు, ఓట్ల శాతంపై వివరాలు వెల్లడించారు.

2024 అసెంబ్లీ ఎన్నికల్లో కూటమికి 55.3 శాతం ఓట్లు రాగా, వైఎస్సార్సీపీకి 39.81 శాతం ఓట్లు వచ్చాయని చంద్రబాబు తెలిపారు. తాజా స్థానిక ఎన్నికల్లో కూటమి ఓట్ల శాతం 58.90కి పెరిగిందని, వైఎస్సార్సీపీకి 33.56 శాతం మాత్రమే లభించిందని చెప్పారు. గత ఎన్నికలతో పోలిస్తే వైసీపీ ఓట్ల శాతం 6.25 మేర తగ్గిందని వివరించారు. కూటమికి, వైసీపీకి మధ్య ఓట్ల వ్యత్యాసం 25.34 శాతంగా ఉందన్నారు.

పట్టణ ప్రాంతాల్లో కూటమికి 59.9 శాతం, వైసీపీకి 34.3 శాతం ఓట్లు వచ్చాయని తెలిపారు. పట్టణాల్లో కూటమి 94 శాతం స్ట్రైక్రేట్ సాధించిందని వెల్లడించారు. జడ్పీటీసీ ఎన్నికల్లో 28 జిల్లాలకు గాను 27 జిల్లాల్లో కూటమి ఆధిక్యం సాధించిందన్నారు. ఎంపీటీసీల్లోనూ 90 శాతానికి పైగా విజయాలు నమోదయ్యాయని పేర్కొన్నారు.

గతంలో ఈవీఎంలపై ఆరోపణలు చేసిన వైసీపీ, ఇప్పుడు బ్యాలెట్ పద్ధతిలో జరిగిన ఎన్నికల ఫలితాలను కూడా అంగీకరించాలని చంద్రబాబు హితవు పలికారు. ఇకనైనా నిరాధార ఆరోపణలు మానుకోవాలని సూచించారు.

---------------

హిందూస్తాన్ సమచార్ / పుట్టా సుమన్