హైదరాబాద్, 09 నవంబర్ (హి.స.)

దీపావళి సంబరాలు చాలా మందికి గాయాలతో ముగిసాయి. హైదరాబాద్ నగరంలో బాణసంచా కాల్చుతూ కళ్లకు దెబ్బలు తగిలిన వారు పెద్ద సంఖ్యలో ఆసుపత్రులకు చేరుకున్నారు. చిన్న పిల్లల దగ్గరి నుంచి పెద్దల వరకు ఎంతో మంది ఈ ప్రమాదాల బారిన పడ్డారని వైద్యులు చెబుతున్నారు.

మెహదీపట్నంలోని సరోజినీ దేవి కంటి ఆసుపత్రికి కంటి గాయాలతో వచ్చిన వారి సంఖ్య ఎక్కువగా ఉంది. తాజా లెక్కల ప్రకారం ఒక్క ఈ ఆసుపత్రికే 32 మంది చికిత్స కోసం వచ్చారు. అందులో ఆరుగురిని అడ్మిట్ చేసుకోగా, వారిలో నలుగురు చిన్నారులు ఉన్నారని వైద్యులు తెలిపారు. మిగిలిన 26 మందికి చికిత్స చేసి, మళ్లీ పరీక్షల కోసం రావాలని సూచించారు. ఈ బాధితుల్లో ఒక వ్యక్తి కుడి కంటి చూపును పూర్తిగా కోల్పోయారని ఆసుపత్రి వర్గాలు వెల్లడించాయి.

దీపావళి సమయంలో ఇలాంటి ప్రమాదాలు జరుగుతాయని ముందే ఊహించిన సరోజినీదేవి ఆసుపత్రి అన్ని ఏర్పాట్లు చేసుకుంది. 550 పడకలు ఉన్న ఈ ఆసుపత్రిలో బాణసంచా బాధితుల కోసం ప్రత్యేకంగా 20 పడకలను సిద్ధంగా ఉంచారు. వైద్యులు, నర్సులు, ఇతర సిబ్బందిని అందుబాటులో ఉంచడంతో పాటు అత్యవసరంగా బాధితులను తీసుకురావడానికి అంబులెన్సులను కూడా రెడీగా పెట్టారు.

---------------

హిందూస్తాన్ సమచార్ / సంపత్ రావు, జర్నలిస్ట్..