అమరావతి , 09 నవంబర్ (హి.స.)

ఆంధ్రప్రదేశ్లో కూటమి ప్రభుత్వానికి ప్రజల నుంచి తిరుగులేని మద్దతు లభిస్తోందని విజయవాడ ఎంపీ కేశినేని చిన్ని ధీమా వ్యక్తం చేశారు. రాష్ట్రంలో మరో 20 ఏళ్లపాటు కూటమి అధికారంలో కొనసాగుతుందని ఆయన ఆశాభావం వ్యక్తం చేశారు. తాజాగా జరిగిన స్థానిక సంస్థల ఎన్నికల్లో ప్రజలు కూటమి అభ్యర్థులకు అండగా నిలిచారని పేర్కొన్నారు.

ముఖ్యమంత్రి చంద్రబాబు నాయుడు నాయకత్వంపై ప్రజలకు పూర్తి విశ్వాసం ఉందని, ఎన్నికల ఫలితాలు మరోసారి అదే విషయాన్ని స్పష్టం చేశాయని కేశినేని చిన్ని వ్యాఖ్యానించారు. రాష్ట్ర అభివృద్ధి, సంక్షేమ కార్యక్రమాలకు ప్రజలు మద్దతు పలుకుతున్నారని అన్నారు. కూటమి ప్రభుత్వం చేపడుతున్న పాలన పట్ల ప్రజలు సంతృప్తిగా ఉన్నారనేందుకు స్థానిక ఎన్నికల ఫలితాలే నిదర్శనమని అభిప్రాయపడ్డారు.

ఇక ఎన్నికల నిర్వహణపై వస్తున్న విమర్శలను కూడా ఎంపీ ఖండించారు. ఎన్నికల్లో ఎలాంటి అక్రమాలు చోటుచేసుకోలేదని స్పష్టం చేశారు. ప్రజాస్వామ్యబద్ధంగానే ఎన్నికల ప్రక్రియ పూర్తయిందని పేర్కొన్నారు. ప్రజల తీర్పును అన్ని రాజకీయ పార్టీలు గౌరవించాలని సూచించారు. రాబోయే రోజుల్లోనూ కూటమి ప్రభుత్వం ప్రజల నమ్మకాన్ని నిలబెట్టుకుంటూ రాష్ట్ర అభివృద్ధికి కృషి చేస్తుందని కేశినేని చిన్ని విశ్వాసం వ్యక్తం చేశారు.

---------------

హిందూస్తాన్ సమచార్ / పుట్టా సుమన్