హైదరాబాద్, 12 జూలై (హి.స.)

భారతీయ సినీ సంగీత ప్రపంచంలో తనకంటూ ఒక ప్రత్యేక స్థానాన్ని సంపాదించుకున్న లెజెండరీ గాయని, 'గాన కోకిల' ఎస్. జానకి (88) కన్నుమూశారు. కొంతకాలంగా వయసు సంబంధిత అనారోగ్యం సమస్యలతో బాధపడుతున్న ఆమె, శనివారం మైసూరులోని ఒక ప్రైవేట్ ఆసుపత్రిలో చికిత్స పొందుతూ తుదిశ్వాస విడిచారు. జానకమ్మ మృతి వార్తతో యావత్ సినీ పరిశ్రమ శోకసంద్రంలో మునిగిపోయింది. ఆమె మరణం పట్ల మెగాస్టార్ చిరంజీవి తీవ్ర విచారం వ్యక్తం చేశారు.

ఈ సందర్భంగా సోషల్ మీడియా వేదిక 'ఎక్స్' ద్వారా ఆయన నివాళులర్పించారు. తెరపై మేము పండించిన ఎన్నో భావోద్వేగాలకు ఆమె గొంతు ప్రాణం పోసింది. ఆమె ఒక అసాధారణ కళాకారిణి అని పేర్కొన్నారు. తన సినీ ప్రయాణంలో ఎన్నో మరపురాని గీతాలకు ఆమె తన అపురూపమైన గాత్రాన్ని అందించారని చిరంజీవి గుర్తుచేసుకున్నారు. తన కెరీర్‌లో ప్రేక్షకులు ఆదరించిన ఎన్నో మధురమైన పాటల వెనుక జానకమ్మ గారి గాత్రం ఉందని కొనియాడారు. ఆ పాటలు వినిపించిన ప్రతిసారీ, ఆ జ్ఞాపకాలు మళ్లీ కళ్లముందు సజీవంగా నిలుస్తాయని ఆయన ఆవేదన వ్యక్తం చేశారు.

జానకమ్మ గారు కేవలం ఒక గాయని మాత్రమే కాదు, భావాన్ని స్వరంగా మార్చిన అసాధారణ కళాకారిణి, ఆమె పాడిన ప్రతి పాట ఒక జ్ఞాపకం... ఒక అనుభూతి... ఒక జీవితకాలపు అనుబంధం. నేడు మనం సంగీత ప్రపంచంలోని ఒక మహోన్నత శిఖరాన్ని కోల్పోయాం. కానీ ఆమె గానం రాబోయే ఎన్నో తరాలకు స్ఫూర్తిగా, మన జీవితాలకు నేపథ్య సంగీతంగా చిరకాలం మార్మోగుతూనే ఉంటుంది. ఎస్. జానకి గారి కుటుంబ సభ్యులకు, ఆత్మీయులకు మరియు ఆమెను ఆరాధించే కోట్లాది మంది సంగీతాభిమానులకు నా ప్రగాఢ సానుభూతి తెలియజేస్తున్నాను అని చిరంజీవి పేర్కొన్నారు. జానకమ్మ గారు... మీ స్వరం ఎప్పటికీ అమరం. ఓం శాంతి అంటూ ఆయన తన నివాళిని ముగించారు.

---------------

హిందూస్తాన్ సమచార్ / Santhosha Laxmi