శ్రీనగర్ (జమ్మూ కాశ్మీర్), 13 జూలై (హి.స.)

జమ్మూ కాశ్మీర్ ముఖ్యమంత్రి మరియు నేషనల్ కాన్ఫరెన్స్ (NC) అధినేత ఒమర్ అబ్దుల్లాకు భారతీయ జనతా పార్టీ (BJP) రూ. 100 కోట్ల భారీ పరువు నష్టం చట్టపరమైన నోటీసును జారీ చేసింది. నేషనల్ కాన్ఫరెన్స్ ప్రభుత్వం కూల్చేందుకు తమ పార్టీ ఎమ్మెల్యేలకు బీజేపీ రూ. 20 నుండి 30 కోట్ల నగదు మరియు మంత్రి పదవులను ఎరవేసిందంటూ ఒమర్ అబ్దుల్లా ఇటీవల చేసిన ఆరోపణలపై బీజేపీ తీవ్రంగా స్పందించింది.

జమ్మూ కాశ్మీర్ బీజేపీ అధ్యక్షుడు, రాజ్యసభ ఎంపీ సత్ పాల్ శర్మ తరఫున అడ్వకేట్ పరిమోక్ష్ సేథ్ ఈ లీగల్ నోటీసును పంపారు. ముఖ్యమంత్రి చేసిన ఆరోపణలు పూర్తిగా అసత్యం, నిరాధారం మరియు పరువు నష్టం కలిగించేలా ఉన్నాయని నోటీసులో పేర్కొన్నారు. జూలై 11న శ్రీనగర్‌లో జరిగిన ఒక పార్టీ సదస్సులో ఒమర్ అబ్దుల్లా మాట్లాడుతూ.. జమ్మూ ప్రాంతానికి చెందిన ఎన్‌సీ ఎమ్మెల్యేలను చేర్చుకోవడానికి సుప్రీంకోర్టు లాయర్ అయిన ఒక సీనియర్ బీజేపీ నేత స్వయంగా లంచాలు ఆఫర్ చేశారని ఆరోపించారు.

ఈ ఆరోపణలను పూర్తిగా తిరస్కరించిన బీజేపీ, ఇవి పార్టీ ప్రతిష్టను దెబ్బతీసేందుకు ఉద్దేశపూర్వకంగా చేసిన దురుద్దేశపూరిత వ్యాఖ్యలని స్పష్టం చేసింది. ఈ నోటీసు అందిన ఏడు రోజుల్లోగా ఒమర్ అబ్దుల్లా తన ఆరోపణలను లిఖితపూర్వకంగా ఉపసంహరించుకోవాలని మరియు బేషరతుగా బహిరంగ క్షమాపణ చెప్పాలని డిమాండ్ చేసింది. ఒకవేళ నిర్ణీత గడువులోగా క్షమాపణలు చెప్పకపోతే లేదా తగిన ఆధారాలు సమర్పించకపోతే.. సివిల్ మరియు క్రిమినల్ చట్టాల కింద న్యాయస్థానంలో రూ. 100 కోట్ల పరువు నష్టం దావా వేస్తామని హెచ్చరించింది.

హిందూస్తాన్ సమచార్ / Santhosha Laxmi