ఆకివీడు, 27 జూలై (హి.స.)

పశ్చిమ గోదావరి జిల్లా ఆకివీడులో నిర్మించ తలపెట్టిన రామాలయ ప్రాజెక్టుకు దేశ అత్యున్నత న్యాయస్థానం సుప్రీంకోర్టు తుది అనుమతులు మంజూరు చేయడంపై ఆంధ్రప్రదేశ్ అసెంబ్లీ డిప్యూటీ స్పీకర్ రఘురామ కృష్ణ రాజు (RRR) తీవ్ర సంతోషం వ్యక్తం చేశారు. ప్రభుత్వ స్థలంలో ఆలయ నిర్మాణాన్ని అడ్డుకునేందుకు కొందరు దాఖలు చేసిన పిటిషన్‌ను సుప్రీంకోర్టు కొట్టివేయడాన్ని ఆయన స్వాగతించారు. ఆకివీడు రాముడు సుప్రీంకోర్టులో గెలిచాడు.. సత్యం గెలిచింది, ధర్మం గెలిచింది అంటూ ఆయన సామాజిక మాధ్యమాల ద్వారా భావోద్వేగంగా స్పందించారు. గతంలో స్థానిక జిల్లా కలెక్టర్ అన్ని నిబంధనలను పరిశీలించిన తర్వాతే చట్టబద్ధంగా నిరభ్యంతర పత్రం (NOC) ఇచ్చారని, దానిని సుప్రీంకోర్టు సమర్థించడం ద్వారా ఆలయ నిర్మాణానికి ఉన్న అన్ని ప్రధాన న్యాయపరమైన అడ్డంకులు పూర్తిగా తొలగిపోయాయని ఆయన పేర్కొన్నారు. ఈ చారిత్రాత్మక తీర్పుతో ఆకివీడులో రామాలయ పనులను భక్తుల సహకారంతో అత్యంత వేగంగా, వైభవంగా ముందుకు తీసుకువెళ్తామని రఘురామ కృష్ణ రాజు స్పష్టం చేశారు.

---------------

హిందూస్తాన్ సమచార్ / Santhosha Laxmi