ఢిల్లీ, 29 జూలై (హి.స.)

దేశవ్యాప్తంగా తీవ్ర కలకలం సృష్టించిన నీట్-యూజీ (NEET-UG) ప్రశ్నాపత్రం లీకేజీ కేసులో కేంద్ర దర్యాప్తు సంస్థ (CBI) కీలక ముందడుగు వేసింది. ఈ కేసులో అరెస్టయిన 13 మంది నిందితులపై సీబీఐ ఢిల్లీలోని రౌస్ అవెన్యూ కోర్టులో తొలి చార్జ్‌షీట్ దాఖలు చేసింది. నేరపూరిత కుట్ర, మోసం, సాక్ష్యాధారాల ధ్వంసంతో పాటు కొత్తగా అమల్లోకి వచ్చిన ప్రజా పరీక్షల (అన్యాయ మార్గాల నివారణ) చట్టం–2024, అవినీతి నిరోధక చట్టం కింద నిందితులపై కేసులు నమోదు చేసింది.

ఈ దర్యాప్తులో 360 మంది సాక్షులను, 422 కీలక పత్రాలను, 43 భౌతిక ఆధారాలను సీబీఐ కోర్టు ముందుంచింది. చార్జ్‌షీట్‌లో పేర్కొన్న 13 మంది నిందితులు ప్రస్తుతం జ్యుడిషియల్ కస్టడీలో ఉన్నారు. వీరిలో నేషనల్ టెస్టింగ్ ఏజెన్సీ (NTA) వద్ద కన్సల్టెంట్‌లుగా పని చేసిన ముగ్గురు సబ్జెక్ట్ నిపుణులు (కెమిస్ట్రీ, ఫిజిక్స్, బయాలజీ), కోచింగ్ సెంటర్ల నిర్వాహకులు, పలువురు మధ్యవర్తులు ఉన్నారు. దర్యాప్తు సంస్థ నిందితుల బ్యాంక్ ఖాతాలు, లాకర్లు మరియు డీమ్యాట్ ఖాతాలను కూడా స్తంభింపజేసింది.

అయితే ఎన్‌టీఏలోని ప్రభుత్వ అధికారులకు ఈ లీకేజీలో నేరుగా సంబంధం ఉన్నట్లు లేదా సంస్థాగత అవినీతి జరిగినట్లు ఆధారాలు లభించలేదని, కేవలం ప్రైవేట్ వ్యక్తులు మరియు సబ్జెక్ట్ నిపుణుల ద్వారానే ఈ లీక్ ప్రణాళిక జరిగిందని సీబీఐ వెల్లడించింది. ఈ రోజు ప్రత్యేక ఫాస్ట్‌ట్రాక్ కోర్టు ఈ చార్జ్‌షీట్‌ను విచారణకు స్వీకరించనుంది.

---------------

హిందూస్తాన్ సమచార్ / Santhosha Laxmi