హైదరాబాద్, 01 ఆగస్టు (హి.స.)ఉద్యోగుల భవిష్యనిధి సంస్థ(ఈపీఎఫ్వో) పింఛన్లు నిలిచిపోయాయి. చిన్న మొత్తంలో ప్రతినెలా 27న బ్యాంకు ఖాతాల ద్వారా అందుకునేవారికి జులై నెలాఖరైనా మంజూరు కాలేదు. ఈపీఎఫ్వోలో కొత్త సాఫ్ట్వేర్ ఉన్నతీకరణ నేపథ్యంలో ఈ సమస్య నెలకొంది.తెలంగాణలో 4.63 లక్షలు, ఏపీలో 3.29 లక్షల మంది పింఛనుదారులకు పింఛన్లు నిలిచిపోయాయి. ఇటీవల ఈపీఎఫ్వో సాఫ్ట్వేర్లో కీలక మార్పుల తర్వాత సెంట్రలైజ్డ్ డేటాబేస్ ద్వారా పింఛన్లను మంజూరు చేస్తుండటంతో.. తెలుగు రాష్ట్రాలకు చెల్లింపు ప్రక్రియ స్లాట్ శుక్రవారం లభించింది. ఈ క్రమంలో శనివారం లేదా సోమవారం రోజున పింఛన్లు మంజూరయ్యే అవకాశాలున్నట్లు ఈపీఎఫ్వో వర్గాలు వెల్లడించాయి. జులై నెలకు మాత్రమే ఆలస్యమైందని.. వచ్చే నెల నుంచి పూర్వవిధానంలో చెల్లింపులు ఉంటాయని వివరించాయి.

---------------

హిందూస్తాన్ సమచార్ / రాశి భాగాయత్