శ్రీకాకుళం, 09 ఆగస్టు (హి.స.)

శ్రీకాకుళం జిల్లా అమదాలవలస ప్రాంతంలో విధి నిర్వహణలో ఉన్న మహిళా సబ్ ఇన్‌స్పెక్టర్ (SI) పట్ల అత్యంత దారుణంగా, అసభ్యకరంగా ప్రవర్తించిన కేసులో పోలీసులు అర్థరాత్రి వేళ మెరుపు దాడి చేసి మొత్తం 9 మందిని అరెస్ట్ చేశారు.ఈ కేసులో ప్రధాన నిందితుడిగా వైఎస్సార్‌సీపీ స్థానిక ఇన్‌ఛార్జ్ సువ్వారి రవి కిరణ్ సోదరుడు ఉన్నట్లు పోలీసులు నిర్ధారించారు. శాంతిభద్రతల పరిరక్షణ కోసం విధులు నిర్వర్తిస్తున్న మహిళా అధికారిణిపైనే ఇంతటి దుశ్చర్యకు పాల్పడటం రాష్ట్రవ్యాప్తంగా తీవ్ర కలకలం రేపింది.ఈ ఘటనపై తీవ్రంగా స్పందించిన ఉన్నతాధికారులు నిందితులను ఏమాత్రం ఉపేక్షించవద్దని ఆదేశించడంతో, ప్రత్యేక బృందాలు రంగంలోకి దిగి నిందితుల ఆచూకీ కనిపెట్టి జైలుకు తరలించారు. మహిళా రక్షణ, పోలీసుల నైతిక స్థైర్యాన్ని దెబ్బతీసే ఇలాంటి ఉదంతాల్లో చట్టప్రకారం కఠినమైన సెక్షన్ల కింద కేసులు నమోదు చేసినట్లు అధికారులు స్పష్టం చేశారు.

---------------

హిందూస్తాన్ సమచార్ / Santhosha Laxmi