హైదరాబాద్, 17 సెప్టెంబర్ (హి.స.)

సికింద్రాబాద్ పరేడ్ గ్రౌండ్స్‌లో కేంద్ర ప్రభుత్వం ఘనంగా నిర్వహించిన 79వ హైదరాబాద్ విమోచన దినోత్సవ వేడుకలు దేశభక్తి స్ఫూర్తితో విజయవంతంగా జరిగాయి. ఈ చారిత్రాత్మక కార్యక్రమానికి ముఖ్య అతిథిగా విచ్చేసిన భారత ఉపరాష్ట్రపతి శ్రీ సి.పి. రాధాకృష్ణన్ జాతీయ పతాకాన్ని ఆవిష్కరించి, గౌరవ వందనం స్వీకరించారు. అనంతరం ఆయన ప్రసంగిస్తూ, 1948 సెప్టెంబర్ 17న నిజాం సైన్యం లొంగిపోవడంతో సాధ్యమైన హైదరాబాద్ సంస్థాన విలీనం స్వాతంత్ర్య భారత చరిత్రలోనే అత్యంత కీలకమైన ఘట్టమని పేర్కొన్నారు. భారతదేశం రాజకీయంగా ముక్కలు కాకుండా అఖండ భారతాన్ని నిర్మించడంలో ఉక్కుమనిషి సర్దార్ వల్లభాయ్ పటేల్ చూపిన తెగువను, అలాగే మహాత్మా గాంధీ, సుభాష్ చంద్రబోస్ వంటి మహనీయుల పోరాటాలను ఆయన ఈ సందర్భంగా స్మరించుకున్నారు. భౌగోళిక ఏకీకరణ కంటే రాజ్యాంగ ప్రజాస్వామ్యం ద్వారా పౌరులందరికీ సమాన హక్కులు, గౌరవం కల్పించడమే నిజమైన ఐక్యతకు నిదర్శనమని ఉపరాష్ట్రపతి స్పష్టం చేశారు.

ఈ వేడుకల్లో గౌరవ అతిథిగా పాల్గొన్న తెలంగాణ గవర్నర్ శ్రీ శివ్‌ప్రతాప్ శుక్లా మాట్లాడుతూ ప్రజలందరికీ విమోచన దినోత్సవ శుభాకాంక్షలు తెలియజేశారు. నిజాం నిరంకుశ పాలనకు, రజాకార్ల అరాచకాలకు వ్యతిరేకంగా యావత్ తెలంగాణ సమాజం, ముఖ్యంగా వీరనారీమణులు చేసిన పోరాటాలు అమూల్యమైనవని ఆయన శ్లాఘించారు. నాటి అమరవీరుల త్యాగాలను, అసలైన విమోచన చరిత్రను ఎవరూ చెరిపేయలేరని, ఈ అమూల్యమైన స్ఫూర్తిని రాబోయే యువ తరానికి సగర్వంగా అందించాల్సిన బాధ్యత మనందరిపై ఉందని గవర్నర్ పిలుపునిచ్చారు. కేంద్ర మంత్రులు జి. కిషన్ రెడ్డి, గజేంద్ర సింగ్ షెకావత్, బండి సంజయ్ కుమార్‌లతో పాటు పలువురు ప్రముఖులు హాజరైన ఈ కార్యక్రమంలో సెంట్రల్ ఆర్మ్‌డ్ పోలీస్ ఫోర్సెస్ నిర్వహించిన మార్చ్ పాస్ట్ మరియు సాంస్కృతిక ప్రదర్శనలు ప్రత్యేక ఆకర్షణగా నిలిచాయి.

---------------

హిందూస్తాన్ సమచార్ / Santhosha Laxmi