కామారెడ్డి, 23 అక్టోబర్ (హి.స.)

ఇప్పటికే ఎరువులు, విత్తనాలు, పురుగుమందులు, కూలీల ఖర్చులతో సతమతమవుతున్న రైతులకు వాతావరణ అనిశ్చితి మరో సవాలుగా మారుతోంది.

వాతావరణంలో చోటుచేసుకుంటున్న మార్పులు, వర్షపాతంలో హెచ్చుతగ్గులు వ్యవసాయ రంగంపై ప్రభావం చూపే అవకాశాలు ఉండటంతో రైతులు ఆందోళన చెందుతున్నారు. ఎల్నినో ప్రభావం రైతుల పాలిట శాపంగా మారుతోంది.

ముఖ్యంగా వర్షాధారంగా పంటలు సాగు చేసే రైతులకు వాతావరణ పరిస్థితులు కీలకంగా మారుతున్నాయి. ప్రకృతి అనుకూలిస్తేనే పంట చేతికి వస్తుందని, దిగుబడులు తగ్గితే పెట్టిన పెట్టుబడులు కూడా తిరిగి వచ్చే పరిస్థితి ఉండదని రైతులు ఆవేదన చెందుతున్నారు. కామారెడ్డి జిల్లా పరిధిలో వరి, పత్తి, మొక్కజొన్న, మిరప తదితర పంటలను సాగు చేసే రైతులు వర్షాలు, నీటి లభ్యతపైనే ఆధారపడుతున్నారు. సరైన సమయంలో వర్షాలు కురవకపోయినా, అధిక ఉష్ణోగ్రతలు నమోదైనా పంటల ఎదుగుదలపై ప్రభావం పడే అవకాశం ఉంది. ఎల్నినో కారణంగా కొన్ని ప్రాంతాల్లో వర్షపాతం తగ్గే అవకాశం ఉన్నప్పటికీ, దాని ప్రభావం ప్రాంతాన్ని బట్టి మారుతుంది.

హిందూస్తాన్ సమచార్ / సంపత్ రావు, జర్నలిస్ట్..