హైదరాబాద్, 26 అక్టోబర్ (హి.స.)

తెలంగాణలో త్వరలో జరగనున్న పట్టభద్రుల ఎమ్మెల్సీ నియోజకవర్గాల ఎన్నికలకు సంబంధించి ఓటర్ల నమోదు ప్రక్రియ వేగవంతం చేయాలని కోరుతూ బీఆర్ఎస్ పార్టీ ప్రతినిధి బృందం సోమవారం రాష్ట్ర ప్రధాన ఎన్నికల అధికారి (CEO) ని కలిసింది. మాజీ మంత్రి తలసాని శ్రీనివాస్ యాదవ్ నాయకత్వంలో వెళ్లిన ఈ బృందంలో పలువురు సీనియర్ నాయకులు, ఎమ్మెల్సీలు పాల్గొన్నారు.

ఈ సందర్భంగా బీఆర్ఎస్ నేతలు ఎన్నికల అధికారికి ఒక వివరణాత్మక వినతిపత్రాన్ని సమర్పించారు. రాష్ట్రంలో పెద్ద ఎత్తున గ్రాడ్యుయేట్లు ఉన్నప్పటికీ, ఓటర్ల నమోదు ప్రక్రియ మందకొడిగా సాగుతోందని ఆందోళన వ్యక్తం చేశారు. బూత్ స్థాయి అధికారుల (BLO) నియామకంలో తీవ్ర జాప్యం జరుగుతోందని, తద్వారా ఆన్‌లైన్ మరియు ఆఫ్‌లైన్ ద్వారా వచ్చిన ఓటరు దరఖాస్తులు వేల సంఖ్యలో పెండింగ్‌లో పడిపోతున్నాయని అధికారుల దృష్టికి తీసుకెళ్లారు.

అర్హత కలిగిన ప్రతి పట్టభద్రుడికి ఓటు హక్కు కల్పించాల్సిన బాధ్యత ఎన్నికల కమిషన్‌పై ఉందనని తలసాని శ్రీనివాస్ యాదవ్ పేర్కొన్నారు. ప్రత్యేకంగా ప్రత్యేక క్యాంపులు నిర్వహించి దరఖాస్తుల పరిశీలన ప్రక్రియను త్వరితగతిన పూర్తి చేయాలని కోరారు. అలాగే, నమోదు గడువును కూడా పొడిగించాలని డిమాండ్ చేశారు.

ఎన్నికలు పారదర్శకంగా, నిష్పాక్షికంగా జరిగేలా చూడాలని, దొంగ ఓటర్ల నమోదుకు తావులేకుండా నిశితంగా పరిశీలించాలని విజ్ఞప్తి చేశారు. బీఆర్ఎస్ నేతలు లేవనెత్తిన అంశాలపై స్పందించిన ప్రధాన ఎన్నికల అధికారి, పరిశీలన ప్రక్రియను వేగవంతం చేసి అర్హులందరికీ ఓటు హక్కు లభించేలా చర్యలు తీసుకుంటామని హామీ ఇచ్చారు.

---------------

హిందూస్తాన్ సమచార్ / Santhosha Laxmi