హైదరాబాద్, 26 అక్టోబర్ (హి.స.)

సైబరాబాద్ పోలీస్ కమిషనరేట్ పరిధిలోని మాదాపూర్ ప్రాంతంలో చెల్లుబాటు అయ్యే పత్రాలు లేకుండా అక్రమంగా నివసిస్తున్న ముగ్గురు ఉజ్బెకిస్థాన్ దేశానికి చెందిన మహిళలను సైబరాబాద్ స్పెషల్ ఆపరేషన్ టీమ్ (SOT) మరియు మాదాపూర్ పోలీసులు సంయుక్తంగా నిర్వహించిన దాడుల్లో అదుపులోకి తీసుకున్నారు.

పోలీసులకు అందిన నమ్మదగిన సమాచారం మేరకు మాదాపూర్‌లోని ఒక నివాస సముదాయంపై సోమవారం దాడులు జరిపారు. ఆ సమయంలో అక్కడే ఉంటున్న ముగ్గురు విదేశీ మహిళలను ప్రశ్నించగా, వారి వద్ద ఎలాంటి నిబంధనల ప్రకారం ఉండాల్సిన పాస్‌పోర్టులు, చెల్లుబాటు అయ్యే వీసాలు లేకపోవడం గమనించారు. దీంతో వారిని తక్షణమే అదుపులోకి తీసుకుని విచారణ చేపట్టారు.

పోలీసుల ప్రాథమిక విచారణలో ఆ మహిళలు నేపాల్ సరిహద్దుల గుండా భారతదేశంలోకి ప్రవేశించినట్లు తెలిసింది. ఢిల్లీ మీదుగా కొన్ని నెలల క్రితం హైదరాబాద్‌ చేరుకుని, నగరంలోని వివిధ ప్రాంతాల్లో తాత్కాలికంగా నివాసం ఉంటున్నట్లు పోలీసులు గుర్తించారు. వీసా గడువు ముగిసినప్పటికీ, అధికారులకు ఎలాంటి సమాచారం ఇవ్వకుండా చట్టవిరుద్ధంగా నగరంలో ఉంటున్నారని అధికారులు వెల్లడించారు.

వీరి వెనుక ఏమైనా అంతర్జాతీయ ముఠాల హస్తం ఉందా, వీరికి నగరంలో స్థానికులు ఎవరైనా సహకరించారా అనే కోణంలో పోలీసులు లోతుగా దర్యాప్తు చేస్తున్నారు. ముగ్గురిపై ఫారినర్స్ యాక్ట్ కింద కేసు నమోదు చేసి, తదుపరి న్యాయపరమైన చర్యల కోసం కోర్టులో హాజరుపరచనున్నట్లు శంషాబాద్ డిసిపి తెలిపారు. విదేశీయులకు ఇళ్లు అద్దెకు ఇచ్చే సమయంలో ఇంటి యజమానులు కచ్చితంగా పాస్‌పోర్టు, వీసా వివరాలను పరిశీలించి పోలీసులకు సమాచారం ఇవ్వాలని ఆదేశించారు.

---------------

హిందూస్తాన్ సమచార్ / Santhosha Laxmi