నెల్లూరు , 02 నవంబర్ (హి.స.)

నెల్లూరు జిల్లాలోని కృష్ణపట్నం పోర్టులో అధికారులు మూడో నంబర్ ప్రమాద హెచ్చరికను జారీ చేశారు. బంగాళాఖాతంలో వాతావరణ పరిస్థితులు అనుకూలంగా లేకపోవడం, తుఫాన్ ప్రభావంతో సముద్రం అల్లకల్లోలంగా మారే అవకాశం ఉండటంతో ఈ నిర్ణయం తీసుకున్నారు. తీర ప్రాంతాల్లో బలమైన ఈదురుగాలులు, భారీ వర్షాలు కురిసే సూచనలు ఉండటంతో పోర్టు అధికారులు అప్రమత్తమయ్యారు.

మత్స్యకారులు సముద్రంలోకి వేటకు వెళ్లవద్దని అధికారులు హెచ్చరించారు. ఇప్పటికే సముద్రంలో ఉన్న మత్స్యకారులు వెంటనే సురక్షిత ప్రాంతాలకు చేరుకోవాలని సూచించారు. పోర్టులోకి వచ్చే, బయటకు వెళ్లే నౌకల విషయంలో ప్రత్యేక జాగ్రత్తలు తీసుకోవాలని సంబంధిత సిబ్బందికి ఆదేశాలు జారీ చేశారు. తుఫాన్ పరిస్థితులను ఎప్పటికప్పుడు పర్యవేక్షిస్తూ అవసరమైన చర్యలు చేపడుతున్నారు.

అలాగే పోర్టు పరిసర ప్రాంతాల్లో పనిచేసే సిబ్బంది, సరకు రవాణా కార్యకలాపాల విషయంలో అప్రమత్తంగా ఉండాలని సూచించారు. వాతావరణ శాఖ నుంచి వచ్చే తాజా సమాచారాన్ని బట్టి తదుపరి నిర్ణయాలు తీసుకోనున్నారు. తుఫాన్ ప్రభావం తగ్గే వరకు ప్రజలు సముద్ర తీర ప్రాంతాలకు వెళ్లకుండా జాగ్రత్తలు పాటించాలని అధికారులు సూచిస్తున్నారు.

---------------

హిందూస్తాన్ సమచార్ / పుట్టా సుమన్