అమరావతి , 03 నవంబర్ (హి.స.)

ఆంధ్రప్రదేశ్ రాజకీయాల్లో మరో కీలక పరిణామం చోటుచేసుకుంది. మాజీ మంత్రి, వైఎస్సార్సీపీ నేత అంబటి రాంబాబుకు ఎన్ఫోర్స్మెంట్ డైరెక్టరేట్ (ఈడీ) నోటీసులు జారీ చేసింది. ఏపీ మద్యం రవాణా కేసుకు సంబంధించి మనీలాండరింగ్ ఆరోపణలపై విచారణ చేపట్టేందుకు ఈ సమన్లు పంపినట్లు సమాచారం. ఈ నేపథ్యంలో రేపు ఈడీ అధికారుల ఎదుట విచారణకు హాజరుకావాలని అంబటి రాంబాబును ఆదేశించింది.

మద్యం రవాణా వ్యవహారంలో చోటుచేసుకున్న ఆర్థిక లావాదేవీలు, వాటికి సంబంధించిన అంశాలపై ఈడీ అధికారులు దృష్టి సారించినట్లు తెలుస్తోంది. ఈ కేసులో అంబటి రాంబాబు పాత్రకు సంబంధించి వివరాలు సేకరించడంతో పాటు, ఆయన నుంచి వాంగ్మూలం నమోదు చేయాలని అధికారులు నిర్ణయించారు. ఇందులో భాగంగానే విచారణకు రావాల్సిందిగా నోటీసుల్లో స్పష్టం చేశారు.

ఇప్పటికే ఏపీ మద్యం వ్యవహారం రాజకీయంగా చర్చనీయాంశంగా మారిన నేపథ్యంలో అంబటి రాంబాబుకు ఈడీ సమన్లు జారీ చేయడం ప్రాధాన్యత సంతరించుకుంది. రేపటి విచారణలో అధికారులు అడిగే ప్రశ్నలు, ఆయన వెల్లడించే వివరాలపై రాజకీయ వర్గాల్లో ఆసక్తి నెలకొంది. ఈ విచారణ అనంతరం కేసు దర్యాప్తులో ఎలాంటి పరిణామాలు చోటుచేసుకుంటాయో వేచి చూడాలి.

---------------

హిందూస్తాన్ సమచార్ / పుట్టా సుమన్