ఆనందపురం, 05 ఆగస్టు (హి.స.)

: ఆనందపురం ప్రాథమిక వ్యవసాయ సహకార సంఘం (పీఏసీఎస్) ప్రతిష్ఠాత్మక ‘బెస్ట్ పెర్ఫార్మెన్స్ సొసైటీ’ అవార్డు సొంతం చేసుకుంది. విజయవాడలో నిర్వహించిన ఆంధ్రప్రదేశ్ రాష్ట్ర సహకార బ్యాంకు (ఏపీసీఓబీ) 63వ వార్షికోత్సవ వేడుకల్లో ఈ అవార్డును ప్రదానం చేశారు. 2025-26 ఆర్థిక సంవత్సరంలో రుణాల పంపిణీ, వసూళ్లు, సభ్యులకు మెరుగైన సేవలు, పారదర్శక పాలన, సమర్థవంతమైన ఆర్థిక నిర్వహణలో అత్యుత్తమ పనితీరు కనబరిచినందుకు ఈ అవార్డు లభించింది. విశాఖపట్నం, అనకాపల్లి, అల్లూరి సీతారామరాజు జిల్లాల పరిధిలోని 99 పీఏసీఎస్లలో ఆనందపురం సంఘం ప్రథమ స్థానంలో నిలిచింది.

ఈ సందర్భంగా సహకార సంఘం అధ్యక్షుడు పాండ్రంగి అప్పలరాజు మాట్లాడుతూ.. తాము బాధ్యతలు చేపట్టిన ఏడాదిలోనే రాష్ట్రస్థాయి అవార్డు రావడం ఆనందదాయకమన్నారు. ఈ విజయానికి సహకరించిన భీమిలి ఎమ్మెల్యే గంటా శ్రీనివాసరావు, విశాఖ డీసీసీబీ ఛైర్మన్ కోన తాతారావు, డీసీసీబీ సీఈఓ డీవీఎస్ వర్మ, డీజీఎం ఎం.అశోక్కుమార్, టి.ప్రవీణ, జాయింట్ రిజిస్ట్రార్ కిరణ్ కుమారితో పాటు బ్యాంకు అధికారులకు కృతజ్ఞతలు తెలిపారు.

---------------

హిందూస్తాన్ సమచార్ / నిత్తల రాజీవ