ఢిల్లీ , 22 సెప్టెంబర్ (హి.స.)అయోధ్య శ్రీరామ జన్మభూమి మందిర విరాళాల నిధుల దుర్వినియోగం కేసులో సంచలన విషయాలు వెలుగులోకి వచ్చాయి. రామమందిర కౌంటింగ్ హాల్లోనే కానుకల లెక్కింపు జరుగుతున్న సమయంలో సొమ్మును పక్కదోవ పట్టించడం మరియు దాచిపెట్టడం వంటి ఘటనలు ఏకంగా 105 సార్లు సీసీటీవీ కెమెరాల్లో స్పష్టంగా రికార్డైనట్లు ప్రత్యేక దర్యాప్తు బృందం (SIT) అత్యున్నత న్యాయస్థానానికి వెల్లడించింది. సీజేఐ జస్టిస్ సూర్యకాంత్ నేతృత్వంలోని ధర్మాసనానికి సిట్ బృందం తన సమగ్ర దర్యాప్తు వివరాలను మూసివుంచిన కవర్లో సమర్పించింది.

కేసులో అరెస్టు చేసిన నిందితులకు చట్టబద్ధమైన గడువు పూర్తయి సులభంగా బెయిల్ లభించకుండా ఉండేందుకు, నిర్దేశిత 90 రోజుల వ్యవధిలోనే విచారణ పూర్తిచేసి సెప్టెంబర్ 25 నాటికి చార్జిషీట్ దాఖలు చేయనున్నట్లు సోలిసిటర్ జనరల్ తుషార్ మెహతా కోర్టుకు తెలిపారు. ఈ చోరీకి సంబంధించి రామమందిర ట్రస్ట్ ప్రతినిధులు, బ్యాంక్ అధికారులు, భద్రతా సిబ్బందితో సహా 173 మంది సాక్షుల వాంగ్మూలాలను సిట్ నమోదు చేసింది. డిజిటల్ డేటా, ఫోరెన్సిక్ ఆడిట్ నివేదికలు మరియు సీసీటీవీ దృశ్యాల ఆధారంగా నిందితులను గుర్తించినట్లు సిట్ పేర్కొంది.

మరోవైపు కానుకగా వచ్చిన కేజీల కొద్దీ వెండి ఇటుకలు, ఆభరణాలు మరియు స్టేట్ బ్యాంక్ ఆఫ్ ఇండియా లాకర్లో ఉన్న 803 విలువైన కానుకలను భౌతికంగా తనిఖీ చేయగా, వాటి లెక్కల్లో ఎలాంటి తేడాలు లేవని నివేదిక స్పష్టం చేసింది. కేసు విచారణను నిష్పాక్షికంగా ముగించి, దాఖలు చేసిన చార్జిషీట్ ప్రతిని సుప్రీంకోర్టుకు కూడా సమర్పించాలని ధర్మాసనం ఆదేశించింది.

---------------

హిందూస్తాన్ సమచార్ / పుట్టా సుమన్