ఢిల్లీ , 22 సెప్టెంబర్ (హి.స.)ముంబైలోని ప్రతిష్టాత్మక ఐఐటీ బాంబేలో ద్వితీయ సంవత్సరం బి.టెక్ విద్యార్థి సహిల్ వాకోడే ఆత్మహత్యకు పాల్పడటం తీవ్ర ఆందోళనకు దారితీసింది. ఈ విషాదకర ఘటనపై క్యాంపస్కు చెందిన విద్యార్థి ప్రతినిధి బృందం స్పందిస్తూ, విద్యా సంబంధిత అక్రమాలను లేదా కాపీయింగ్ను తాము ఎంతమాత్రమూ సమర్థించబోమని స్పష్టం చేసింది.

అయితే అదే సమయంలో, ఈ విచారణ ప్రక్రియ పారదర్శకంగా, నిష్పాక్షికంగా సాగాలని, బాధ్యులపై చట్టపరమైన చర్యలు తీసుకోవాలని పట్టుబట్టింది.

ఈ వివాదం సృష్టించిన ఉద్రిక్తతల మధ్య, పరిపాలనా వ్యవహారాల డీన్గా ఉన్న ప్రొఫెసర్ సూర్యనారాయణ డూల్లాను ఆ పదవి నుంచి ఐఐటీ యాజమాన్యం పక్కనబెట్టింది. పరీక్షలో సాంకేతిక పరిజ్ఞానాన్ని ఉపయోగించి కాపీ కొట్టాడనే నెపంతో ప్రొఫెసర్ మరియు యాజమాన్యం సహిల్పై తీవ్ర ఒత్తిడి తెచ్చారని, అతడిని మానసిక వేధింపులకు గురిచేశారని కుటుంబ సభ్యులు ఆరోపిస్తున్నారు. బాధితుడి తల్లిదండ్రుల ఫిర్యాదు మేరకు ముంబై పోలీసులు ప్రొఫెసర్ డూల్లాపై ఎస్సీ/ఎస్టీ అట్రాసిటీ సహా ఆత్మహత్యాయత్నానికి ప్రేరేపించినట్లు కేసు నమోదు చేసి, విచారణను క్రైమ్ బ్రాంచ్కు అప్పగించారు.

క్యాంపస్లో విద్యార్థుల భద్రత, మానసిక ఆరోగ్య పరిరక్షణతో పాటు, ఎలాంటి పక్షపాతం లేని స్వతంత్ర దర్యాప్తు జరగడమే సూర్యనారాయణ డూల్లా వ్యవహారంలోనూ, సహిల్ మరణానికి సంబంధించిన అసలు నిజాలను వెలికితీయడంలోనూ ఏకైక మార్గమని విద్యార్థి సంఘం అభిప్రాయపడింది.

---------------

హిందూస్తాన్ సమచార్ / పుట్టా సుమన్